Pas javësh nervozizmi për shkak të naftës dhe Lindjes së Mesme, tregjet globale po hyjnë ngadalë në një fazë më të qetë. Investitorët po e zhvendosin vështrimin nga rreziqet gjeopolitike drejt diçkaje më të parashikueshme - rezultateve korporative dhe vendimeve të Rezervës Federale amerikane (FED).

Faktori kyç për qetësimin është nafta. OPEC plus vendosi ta rrisë prodhimin me 188.000 fuçi në ditë nga gushti, ndërsa qarkullimi nëpër Ngushticën e Hormuzit po normalizohet - çka i uli frikërat për ndërprerje në furnizim. Rezultati: çmimi i naftës „Brent“ u mbajt rreth 72 dollarë për fuçi, larg projeksioneve panike të para disa javësh.

Kur nafta qetësohet, qetësohen edhe bursat më të mëdha. Tani vëmendja po zhvendoset drejt sezonit të rezultateve tremujore - fillon në SHBA me kompani si Delta dhe PepsiCo, ndërsa javën e ardhshme vijnë edhe bankat e mëdha. Analistët presin rritje të fitimit rreth 25 për qind, të udhëhequr nga sektori teknologjik dhe ai energjetik. Samsung, për shembull, pritet të raportojë rritje të fortë të nxitur nga kërkesa për çipa për inteligjencë artificiale.

Për Ballkanin, kjo qetësi e largët e bursave nuk është abstraksion. Çmimi i naftës e dikton drejtpërdrejt çmimin e karburantit në pompat tona, ndërsa vendimet e FED-it për normat e interesit ndikojnë në çdo hua, çdo këst, çdo kredi që marrim. Kur tregjet e mëdha marrin frymë më qetë, herët a vonë kjo ndihet edhe në xhepin tonë - pyetja është vetëm nëse qetësimi do të zgjasë mjaftueshëm sa të arrijë tek ne, apo kriza e radhës do ta ndërpresë para kësaj.