Në shpatet e Vodnës, atje ku terreni është i pjerrët dhe i prirur ndaj erozionit, komuna Qendër planifikon një plan të ri të detajuar urbanistik (PDU) për lokacionin Barutana - me të cilin parashikohet ndërtimi i dhjetëra objekteve të mëdha. Dhe pikërisht këtu nis një mosmarrëveshje që rihap pyetjen e vjetër: a ndërtohet Shkupi sipas ekspertëve, apo sipas interesave?

Nisma „Shansa për Qendrën“ bie kushtrimin. Sipas saj, zona e planifikuar tashmë është shënuar si erozive në Planin komunal për energjetikë dhe klimë, me rekomandim që aty të mbillen pyje cilësore - e jo të ngrihen ndërtesa banimi. Edhe më e diskutueshme: vetë programi i projektit thotë se mbrojtja nga erozioni është „masë mbrojtëse e detyrueshme“, por plani, thonë kritikët, nuk përmban asnjë masë për mbrojtje nga erozioni, as nga zjarret dhe vërshimet e mundshme.

Paralajmërimet s'janë nxjerrë nga ajri. Në shpatet e Vodnës tashmë ka pasur rrëshqitje dheu - mes tjerash edhe afër një klinike fëmijësh dhe një hoteli. „Pse injorohen mendimet e ekspertëve?“, pyesin nga nisma, duke kujtuar se ka raste konkrete rrëshqitjeje nëpër lagjet e Vodnës, e prapëseprapë në terrenin e pjerrët malor parashikohen dhjetëra objekte të mëdha.

Ky s'është tregim për disa ndërtesa - është tregim për atë se kush vendos si duket qyteti dhe interesat e kujt peshojnë më shumë. Kur një dokument inxhinierik thotë „mbillni pyll“, e një plan urbanistik thotë „ndërtoni ndërtesa“, dikush me vetëdije zgjodhi cilin mendim do ta dëgjojë. Pyetja që çdo shkupjan duhet ta bëjë është e thjeshtë: sa vlejnë „mundësitë e reja“ nëse hapin vetëm rreziqe të reja - rrëshqitje, përmbytje, zjarr - për ata që do të jetojnë nën to?