Pas vitesh pritjeje, më në fund u nënshkrua kontrata për financimin e segmentit të dytë të autostradës Shkup - Bllacë. Banka Evropiane për Rindërtim dhe Zhvillim (BERZH) siguron një hua prej 192 milionë euro, të cilave u shtohen edhe 30 milionë euro grant përmes instrumentit WBIF - gjithsej rreth 222 milionë euro për projektin.

Autostrada është pjesë e Korridorit 6, që duhet t'i lidhë Shkupin dhe Prishtinën, dhe prej vitesh përmendet në premtime para çdo zgjedhjeje. Kontratën e nënshkruan ministri i financave Fatmir Besimi, përfaqësues të BERZH-it dhe drejtorët e Ndërmarrjes publike për rrugë shtetërore dhe të ESM-së, ndërsa në nënshkrim morën pjesë edhe ministrat e ekonomisë dhe të transportit, si dhe ambasadori i BE-së.

Përveç rrugës, i njëjti paket financiar përfshin edhe ndërtimin e elektranave solare në Osllomej dhe Manastir - çka do të thotë se një nënshkrim mbulon njëherësh infrastrukturën e transportit dhe atë energjetike. Besimi theksoi se projekti është „jashtëzakonisht i rëndësishëm për lidhjen ekonomike me Kosovën“, çka në letër tingëllon solide.

Dhe këtu vjen refleksi ballkanik i kujdesit. Një kontratë e nënshkruar nuk është e njëjtë me një rrugë të përfunduar - në këto anë e dimë fort mirë sa autostrada „të nisura“ prej dekadash qëndrojnë si rampa të papërfunduara mes dy arave. 222 milionë euro janë para serioze; pyetja është nëse për to do të marrim një autostradë brenda një afati të arsyeshëm, apo edhe një tregim ku afatet lëvizin më shpejt se makineritë. Do të ndjekim.