Donald Trump flet vazhdimisht, ndaj është e vështirë që ta befasojë dikë. Këtë herë ia doli. Revista Time publikoi transkriptin e plotë të bisedës 75-minutëshe që me presidentin amerikan e zhvilluan korrespondenti Eric Cortellessa dhe kryeredaktori Sam Jacobs - rreth 11.000 fjalë. Në shikim të parë, gjithçka është e njohur: fjali të pafundme, mburrje, fyerje, pasaktësi. Por mes tyre shfaqen momente hutimi, të foluri të palidhur dhe paranoje që vështirë kapërcehen.

Filloi qysh me pyetjen e parë. Trump u mburr se kishte qenë „president i turneut në Çikago, në Marion“. Turneu i golfit Presidents Cup në fakt ishte luajtur në klubin Medinah në Illinois. Trump e kuptoi se po gabonte dhe u përpoq të korrigjohej - „Në fakt, ishte, po, Medina, në Medina, vitin e kaluar, Marion“ - vetëm se ai turne vitin e kaluar nuk ishte luajtur fare, sepse mbahet çdo dy vjet. E në Marion nuk është luajtur kurrë.

Gjë e vogël? Ndoshta. Por në vitin 2024 pikërisht episode të tilla ishin argumenti kryesor se Joe Biden nuk ishte më i aftë për funksionin.

Lufta që u zvarrit

Lufta me Iranin, të cilën Trump e nisi në shkurt, zgjat më shumë se shtatë muaj, edhe pse ai premtonte se do të mbaronte për disa javë. Deri tani janë vrarë të paktën 19 amerikanë dhe mijëra iranianë. I pyetur pse zgjat kaq shumë, Trump tha se „iu përmbajt afatit“, por pastaj „vendosi të shkojë më tej“ - përshkallëzim që nuk ua shpjegoi kurrë qytetarëve, e lëre më të kërkonte miratim nga Kongresi. Për faktin që publiku nuk e kupton pse lufta u zvarrit, fajësoi gazetarët: „Mendoj se gazetarët ua servirën këtë.“

Për Gazën, ku Hamasi edhe dy muaj pasi Trump njoftoi se grupi kishte pranuar çarmatimin ende nuk i ka dorëzuar armët, përgjigjja ishte kjo: „Mendoj se ndoshta do të ulem në Dhomën e Situatës dhe do të marr vendimin e duhur. Vendimet e mia janë të drejta. Dua të them, shikojeni vendin tonë... Disa do të thoshin se është luftë, disa do të thoshin se në të vërtetë nuk është luftë... asgjë nuk ndodhi dy javët e fundit, apo jo? Dhe dikush hedh një bombë, dhe asgjë nuk ndodh.“ Izraeli, ndërkohë, pothuajse çdo ditë kryen sulme ajrore vdekjeprurëse. Pas kësaj përgjigjeje askush nuk mësoi asgjë.

Të gjithë janë kundër tij

Sipas Trumpit, Rezerva Federale i ngriti normat e interesit jo për ta frenuar inflacionin, por vetëm për ta dëmtuar politikisht atë. Frika nga inteligjenca artificiale është „mashtrim“, sepse „i gjithë vendi bazohet në gjëra të rreme“ - njerëzit vuanin nga „sindroma e çmendurisë nga Trump“. E për rënien e mbështetjes te votuesit: „Këto janë shifra të rreme. Sot do ta mundja çdo kundërkandidat me 20 për qind diferencë. Njerëzit që bëjnë sondazhe janë të korruptuar. Pothuajse aq sa gazetarët.“

Pyetini Kennedyn dhe Johnsonin

Kulmi erdhi kur Trump donte të provonte se lufta në Iran është e shkurtër krahasuar me të tjerat. „Pse nuk e pyetët Kennedyn apo Lyndon Johnsonin sa gjatë kanë zhvilluar ata luftëra të ndryshme?“, u tha ai gazetarëve. John F. Kennedy dhe Lyndon Johnson kanë vdekur prej dekadash. Njëri nga gazetarët u përgjigj qetë: „Do t'i kisha pyetur, po të kisha pasur mundësi.“

Shumica e mediave pas publikimit u përqendruan te fakti që Trump humbi nervat dhe me sharje u bërtiste gazetarëve se nuk i kishin bërë asnjë pyetje pozitive. Është e lehtë të mësohesh me këtë, sepse Trump është çdo ditë në publik dhe deklaratat e tij të palidhura janë bërë zhurmë sfondi. Por kjo është mendja që çdo ditë merr vendime për jetë e vdekje, për luftë e për bomba. Nëse kështu do të fliste çdo njeri tjetër, rrethi i tij tashmë do të shqetësohej për shëndetin e tij. Sa herë në Ballkan kemi parë një lider të cilit rrethi vetëm i tund kokën, në vend që ta pyesë nëse është në gjendje?