Gati dy kilogramë eksploziv plastik Semtex, të fshehur në kamionë, kaluan nëpër Bullgari dhe Serbi para se të mbërrinin në Gjermani. Atje duhej të përfundonin në një kanaçe të lidhur me një dron, të drejtuar drejt një aeroplani ukrainas mallrash në aeroportin Leipzig-Halle. Një hetim i përbashkët i gazetarëve britanikë dhe gjermanë tani pohon se e njeh edhe njeriun që e shpiku gjithë planin: rusin Oleg Levushkin, motoçiklist me lidhje të drejtpërdrejtë deri në majën e rrjetit rus të sabotimeve në Evropë.

Shënjestra ishte një Antonov An-124 i parkuar me rreth 25.000 litra kerozinë në rezervuarë. Droni arriti te shënjestra - kanaçja me eksploziv goditi krahun e aeroplanit - por mjeti nuk shpërtheu dhe ra në pistë. Po të shpërthente, një zjarr i madh do ta përfshinte një nga qendrat më të rëndësishme logjistike për ndihmën ushtarake për Ukrainën. Katastrofën e parandaloi fati i pastër, e jo ndonjë shërbim.

Njeri familjar me jetë të dytë

Sipas hetuesve, Levushkin e përpunoi planin, e pastaj angazhoi operativin bjellorus Andrei Karshakou, të ashtuquajturin „agjent i harxhueshëm“, ta kryente vetë sulmin. Në vendngjarje policia gjeti mbetje të tre dronëve dhe një antenë të improvizuar drejtuese të ngjitur në një pemë aty pranë. ADN-ja nga një copë doreze pranë antenës përputhej drejtpërdrejt me Karshakoun, të cilin policia në Finlandë dhe Lituani e njeh që më parë. Ai tashmë lidhet me një zjarrvënie në një dyqan materialesh ndërtimi në qytetin polak Łódź në vitin 2024.

Në publik, Levushkin me vite paraqitej si njeri i qetë familjar që me bashkëshorten dhe vajzat kënaqet me skijim, peshkim dhe ture të gjata me motor nëpër Evropë. Pas fasadës, sipas hetimit, qëndronte kontakt i vazhdueshëm me Denis Smolyaninovin, oficer i lartë që udhëheq sektorin ukrainas në shërbimin rus të inteligjencës ushtarake GRU dhe të cilin shërbimet perëndimore e konsiderojnë planifikues kryesor të sulmeve me bomba nëpër Evropë. Smolyaninov i rekruton bashkëpunëtorët përmes aplikacionit Telegram.

Berlini e dinte, por nuk e ndoqi

Detaji më i pakëndshëm nuk është për Moskën, por për Berlinin. Shërbimet gjermane të sigurisë e dinin se Levushkin është i lidhur me GRU-në që kur hyri në vend përmes Turqisë, por pasi mbërriti, nuk e vunë nën mbikëqyrje operative. Të dhënat nga automjeti që e mori me qira në aeroportin e Berlinit më vonë treguan se ai vizitoi disa lokacione me armë të fshehura, ndërsa pesë ditë para sulmit personalisht e vizitoi aeroportin e Lajpcigut dhe i filmoi terminalet.

Shërbimet perëndimore operacionet ia atribuojnë njësisë famëkeqe 29155 të GRU-së dhe njësisë shoqëruese 52659 - sektorë për likuidime, zjarrvënie dhe diversione, të cilët qëndrojnë edhe pas pakove-bomba që shkaktuan zjarre në magazinat e DHL-së në Birmingham dhe Lajpcig. Kanaçe identike me Semtex më parë ishin gërmuar në një varrezë në Lituani, nga ku duhej të transferoheshin drejt shënjestrave në Poloni dhe Gjermani.

„Gjermania gjithnjë e më shumë po bëhet fushëbetejë operative për shërbimet ruse. Ato që më parë ishin raste të izoluara, tani i shohim në përmasa të mëdha“, paralajmëroi një funksionar i lartë i inteligjencës gjermane. Ambasada ruse në Berlin i hodhi poshtë të gjitha akuzat si një valë e re „histerie antiruse“ dhe porositi se elitat evropiane po shpikin një kërcënim joekzistent për t'i justifikuar buxhetet e mëdha ushtarake para qytetarëve të tyre.

Për rajonin, fjalia më e rëndësishme në gjithë hetimin është ajo për rrugën. Eksplozivi për Lajpcigun udhëtoi me kamionë përmes Bullgarisë dhe Serbisë - nëpër rrugët ku çdo ditë drejt Evropës Perëndimore kalojnë kolona automjetesh mallrash. Nëse gati dy kilogramë Semtex mbërritën nëpër Ballkan deri në Gjermani, çfarë tjetër udhëton në të njëjtën rrugë? Dhe a do të shpjegojnë shërbimet në Sofje dhe Beograd si ndodhi kjo?