Vendin ku Apple me vite testoi makinën e tij sekrete tani e bleu pikërisht ai që ia doli atje ku Apple ra. Waymo, kompania e automjeteve vetëdrejtuese në pronësi të Alphabet, pagoi 220 milionë dollarë për një poligon prej 5.500 hektarësh në Arizona - një pronë që përmes një firme-paravan ishte e lidhur me Apple. Shitja u regjistrua më 5 qershor.

Poligoni nuk është një livadh i zakonshëm. Ka një pistë qyteti prej 115 hektarësh, një zonë për dinamikën e automjetit, një pistë ovale gjashtë e gjysmë kilometra të gjatë dhe një segment autostrade, të ndërtuar posaçërisht për testimin e automjeteve autonome. Waymo thotë se hapësirën do ta përdorë për teste pa shofer, për trajnimin e operacioneve dhe për zgjerim të ardhshëm - me fjalë të tjera, për ta përsosur sistemin para se ta lëshojë në rrugë.

Ironia është e plotë kur shihet historia. Apple e bleu pronën në vitin 2021 për 125 milionë dollarë, pas vitesh me qira, për të testuar prototipet e Project Titan - përpjekjes ambicioze, legjendarisht të shtrenjtë për të bërë makinën e vet. Pas miliardave të shpenzuara, projekti u shua në fillim të vitit 2024. Tani Waymo e merr të njëjtin terren për 95 milionë dollarë më shumë sesa pagoi Apple - dhe me plan, jo me pikëpyetje.

Dallimi mes dy kompanive është pikërisht aty. Apple shpenzonte miliarda dhe në fund hoqi dorë; Waymo tashmë drejton afër 4.000 automjete nëpër më shumë se dhjetë qytete amerikane dhe njofton prodhimin e dhjetëra mijëra robotaksive në vit. Kur njëri gjigant shet një poligon, e tjetri e blen, kjo nuk është thjesht transaksion patundshmërie - është një hartë e asaj se kush e humbi dhe kush e fitoi garën për drejtimin autonom.