Расел Бренд осуден за силување, а Кејти Пери по 15 години молк наводно спрема книга и серија за бракот со него

Британскиот актер и комичар Расел Бренд е прогласен за виновен по четири точки – едно силување и три сексуални напади – врз неколку жени, во периодот од 2004 до 2009 година. Пресудата ја донесе порота на Крунскиот суд во Саутварк, во Лондон. По три други обвиненија, меѓу кои уште две за силување, Бренд е ослободен.

Само неколку дена подоцна, во центарот на приказната е неговата поранешна сопруга Кејти Пери. Според британскиот таблоид Mail on Sunday, кој се повикува на извори блиски до пејачката, 42-годишната Пери водела „активни разговори“ за книга и документарна серија за, како што се наведува, нивниот „темен брак“, а чекала да заврши судењето пред да потпише каков било договор. „Има многу работи за тој брак што луѓето не ги знаат“, наводно рекол извор од нејзиното опкружување. Сè засега доаѓа од анонимни извори, не од самата пејачка.

Бракот траеше кусо и заврши безлично. Се запознаа во 2008 година, на снимањето на филмот Get Him to the Greek, а се венчаа на 23 октомври 2010 во луксузен ресорт во Раџастан, Индија, по хинду обред. Четиринаесет месеци подоцна Бренд поднесе барање за развод, а Пери подоцна откри дека за разделбата дознала преку СМС-порака. Разводот стана правосилен во јули 2012.

Пери денес е во врска со поранешниот канадски премиер Џастин Трудо, а за бракот со Бренд петнаесет години не кажа ништо повеќе од назнаки. Тоа молчење, според изворите, сега има цена – и купувачи.

Тајмингот кажува многу. Додека траеше судењето, приказната беше правна; по пресудата станува комерцијална. Жените што сведочеа пред судот на својата пресуда чекаа речиси две децении. Дали она што следува ќе додаде нешто на вистината за тие години – или само ќе стане уште една сезона на платформа за стриминг?