Заем од 4.000 евра, камата од 2.500 евра за еден месец: двајца Кумановци во притвор, а нотарот без пасош

Заем од 4.000 евра со рок од еден месец – и камата од 2.500 евра. Така, според обвинителството, работела групата од Куманово што оваа недела ја разби полицијата. А кога жртвата ќе го вратеше долгот до последното евро, работата не завршувала. Тогаш почнувале заканите.

Основниот кривичен суд Скопје им определи притвор на Д.П. (37) и М.К. (27), куќен притвор на Л.К. (73), а на Д.Ж. (43) му го одзеде пасошот. Петтиот осомничен, З.Р. (35), е во странство, а меѓународна потерница по него сè уште нема. Обвинителството за организиран криминал ги товари за злосторничко здружување, перење пари и изнуда. Полицијата претходно изврши претреси на шест локации во Куманово и одзеде договори за заем со високи камати, документи за солемнизација на имот, пари, возила и телефони.

Според истрагата, групата ја формирал Д.П. уште во 2021 година. Во еден случај од 2023, иако позајмените пари биле целосно вратени, од жртвата се барало да ја дава својата банкарска сметка за фиктивни уплати и подигања, а потоа и автомобил како залог. Во адвокатска и нотарска канцеларија потоа биле изготвени фиктивни договори за купопродажба и заем од 1.000.000 денари, со фалсификувани потписи. Автомобилот бил препишан на З.Р., а на жртвата ѝ била блокирана сметката преку извршител. Во друг случај, лице што вратило позајмени 180.000 денари и понатаму било изнудувано за дополнителни камати.

Тука приказната престанува да биде само за лихвари. Фалсификуваните договори не поминале низ некој заден двор, туку низ нотарска канцеларија, а сметката не ја блокирал насилник, туку извршител – по закон, врз основа на хартија заверена од носител на јавно овластување. Нотарот, според обвинителството, е лицето со одземен пасош, а се товари за несовесно работење во службата.

Значи, на лихварот му требале само пари и закани. Сè друго – печатот, потписот, блокадата – му го дал системот што треба да ги штити граѓаните. Колку уште вакви договори се заверени во нотарски канцеларии низ земјава, без никој да праша зошто некој „продава“ автомобил за долг што веќе го вратил?