Meta најави дека ќе користи вештачка интелигенција за да анализира фотографии и видеа на Facebook и Instagram – и тоа со цел да открие дали корисникот е помлад од 13 години. Системот ќе ги анализира „општите визуелни знаци” како што се висината и коскената структура на лицето во кадар.

Компанијата веднаш направи дистинкција: ова не е препознавање на лица. „Сакаме да биде јасно: ова не е распознавање на лица. Нашата AI гледа општи теми и визуелни знаци, на пример висина или коскена структура, за да процени општа возраст; не идентификува конкретно лице”, се вели во соопштението.

Системот не работи изолирано. Ги комбинира визуелните сигнали со анализа на текст и интеракции – имендани, споменувања на училиште, постови, коментари, биографии. Ако алгоритмот заклучи дека корисникот е малолетен, профилот се деактивира. Ако корисникот сака да го запази, мора да помине низ процес за верификација на возраст.

За да се разбере точно зошто Meta наеднаш стана толку загрижена за заштита на децата, доволен е еден број – 375 милиони долари. Толку треба да плати компанијата по пресуда на порота во Њу Мексико за тоа што ги довела во заблуда потрошувачите за безбедноста на платформата и ги загрозила децата. Едвај некоја случајност што следната недела гледаме нови мерки.

Meta истовремено ги проширува „Тинејџерските сметки” во 27 земји од ЕУ и во Бразил, и сличен режим ќе биде воведен на Facebook во САД, Велика Британија и ЕУ. Тинејџерските сметки имаат ограничувања на пораки само од следачи, филтри за вознемирувачки коментари, и приватни поставки по дифолт.

Прашањето за нас на Балканот е едноставно: алгоритам кој со помош на висина и коскена структура одлучува дали си малолетен – тоа е технологија која работи, или работи „доволно добро” за да се избегнат тужби? И уште поважно – на чии сервери одат тие фотографии? Meta тврди дека не идентификува конкретни лица. Но истата компанија која со години гледаше како тинејџери ѝ го уништуваат менталното здравје на својата платформа сега бара доверба на збор.