Додека институциите со години расправаат кој е надлежен за заштитата на Охридското Езеро, едни луѓе едноставно влегоа во водата и почнаа да чистат. Денес кај плажата покрај хотелот „Бисер” во Калишта започна четвртата меѓународна еко-акција за чистење на езерото – организирана не од министерство, туку од нуркачки клубови.

Акцијата ја координираат нуркачките клубови „Езерски пулс” и „Скаут”, а покрај домашните нуркачи, се приклучија и гости од Србија и Хрватска. Поканата беше отворена за сите – волонтери, граѓани, еколошки активисти и љубители на природата. Пораката на организаторите е едноставна и директна: грижата за природата е заедничка одговорност, не само задача на институциите.

Токму таа реченица е поентата на целата приказна. Кога граѓани со сопствена опрема и слободно време влегуваат во езерото за да извадат отпад што таму не би требало воопшто да го има, тоа е убав чин – но и тивка обвинителна реченица кон системот. Зошто доброволците мораат да го прават она што е работа на надлежните?

Охридското Езеро е едно од најстарите езера на светот и под заштита на УНЕСКО – статус кој носи обврски, не само туристичка слава. Секоја вреќа ѓубре извадена од дното е и помош и потсетник. Прашањето што останува е дали следната акција пак ќе ја водат нуркачи-волонтери, или некогаш и институциите ќе се нурнат во проблемот.