САД ја прогласија владата во Каракас за нарко-картел, поттикнувајќи шпекулации дека се подготвува воена интервенција.

Американскиот претседател Доналд Трамп објави затворање на небото над Венецуела, неколку дена откако ја прогласи владата во Каракас за нарко-картел и непријател на САД.

„До сите авиокомпании, пилоти, трговци со дрога и луѓе, воздушниот простор над и околу Венецуела е ТОТАЛНО ЗАТВОРЕН. Ви благодарам за вашето внимание“, напиша Трамп во објава на социјалните мрежи.

Шест авиокомпании веќе ги прекинаа летовите до Каракас на 22 ноември, кога Федералната администрација за воздухопловство на САД (FAA) објави дека постои „ризик од воена активност“ во воздушниот простор на Венецуела.

Досега, американските воени сили во регионот извршија 21 напад врз бродови за кои се сомнева дека транспортираат дрога преку Карибите и Пацификот, при што загинаа најмалку 83 лица.

Некои американски медиуми го обвинија Пентагон за кршење на меѓународните конвенции во барем еден од нападите, тврдење што Министерството за војна го негира.