Американскиот претседател Доналд Трамп упати остри закани кон Иран, поставувајќи краен рок до вторник навечер за постигнување договор. Истовремено, според информации на повеќе медиуми, САД, Иран и група регионални посредници водат преговори за потенцијално 45-дневно примирје.

Предложената рамка вклучува двофазен договор. Првата фаза би се состоела од 45-дневен прекин на огнот, за време на кој би се воделе преговори за трајно решение. Втората фаза би воспоставила формален мировен договор. Примирјето би можело да се продолжи доколку е потребно повеќе време за преговори.

Трамп со вулгарен јазик му се закани на Иран, што предизвика бурни реакции во американскиот политички живот. Политичари од двете страни го осудија неговиот тон, а критичарите неговите изјави ги опишаа како знак на „загрижувачка ментална состојба”.

Во меѓувреме, воените операции на двете страни продолжуваат. Белата куќа најави итна прес-конференција за операциите за спасување на пилоти, додека Иран тврди дека уништил американски авиони.

Четири американски, израелски и регионални извори запознаени со преговорите потврдуваат дека посредниците активно разговараат за конкретните услови на рамката, но ниту Белата куќа ниту Стејт департментот засега не коментираа.