Министерството за внатрешни работи најави дека во недела, за време на првиот круг од локалните избори, ќе има засилено полициско присуство во близина на избирачките места, како и на клучните сообраќајни точки низ државата.

Од МВР информираат дека ќе се користат и современи технолошки средства, вклучително и дронови, со цел навремено откривање на можни нарушувања на јавниот ред и мир и гарантирање на безбедноста на граѓаните.

„Министерството континуирано презема мерки и активности во рамки на своите надлежности со цел непречено и безбедно спроведување на изборниот процес. Безбедноста ќе биде обезбедена со мобилни тимови, пунктови и воздушна контрола преку дронови, за побрза реакција во случај на инциденти,“ наведуваат од МВР.

Од Министерството апелираат до граѓаните и политичките партии да придонесат за мирна и демократска атмосфера, да ги почитуваат упатствата на полицијата и да се воздржат од активности кои би можеле да го нарушат изборниот процес.

МВР најави дека во текот на изборниот ден редовно ќе ја информира јавноста за текот на гласањето и сите евентуални случувања поврзани со безбедноста.