Дуа Липа се омажи, и – изненадување – без бела венчаница. Поп-ѕвездата се венча во Лондон со актерот Калум Тарнер, во граѓанска церемонија, облечена во нешто што е поблиску до архитектура отколку до традиционален свадбен фустан. Порака која свесно намигнува кон една друга невеста од пред повеќе од половина век.

Местото не е случајно избрано: Old Marylebone Town Hall, истата општинска сала каде претходно се венчале Пол Макартни, Ринго Стар и Лиам Галагер. Кога ќе се венчаш таму каде се венчале легенди на британската музика, веќе праќаш порака пред да изговориш збор.

Творбата беше висока мода од Schiaparelli, дело на Даниел Розбери – сако боја на слонова коска со архитектонски линии, нагласен струк и структурирана силуета, со асиметрично здолниште и корсаж со бели чипкани детали. Копчињата беа изработени по нарачка со злато и накит. Додатоците: бели ракавици, потпетици Christian Louboutin, ѓердан Bulgari Serpenti и драматичен шешир со широк обод на Stephen Jones, обложен со златен лист.

Инспирацијата е недвосмислена – Бјанка Џагер во 1971, кога се омажи за Мик Џагер во „Le Smoking” сако на Ив Сен Лоран наместо бела венчаница, со ист таков широк шешир. Педесет и пет години подоцна, Дуа Липа го рециклира тој бунт, само со друг потпис. Калум Тарнер, од своја страна, носеше костум по мерка од Ferragamo.

Парот најавува втора прослава во Сицилија. А целата приказна, под сјајот од брендовите, всушност е стара колку и модата сама: вистинскиот луксуз веќе одамна не е во белата венчаница, туку во тоа да можеш да си дозволиш да ги прекршиш правилата – и сите тоа да го прочитаат како стил, а не како скандал.