Запеала без шамија на главата – и за тоа е осудена на 74 удари со камшик. Иранската пејачка Парасту Ахмади, на 29 години, доби и двегодишна забрана за патување и двегодишна забрана за настапи, заедно со осум членови на нејзиниот продукциски тим, осудени за „создавање и објавување вулгарна и неморална содржина“ на интернет.

Нејзиниот „престап“: во декември 2024 година, на концерт во живо пренесен преку нејзиниот канал на YouTube, ја изведе патриотската песна „Од крвта на младите на татковината“ – без хиџаб. Снимката стана вирална, таа набрзо беше приведена и пуштена, а потоа покрената постапка врз основа на објавеното видео.

Адвокати за човекови права укажуваат дека пресудата нема правна основа – пеењето, музиката и создавањето музички дела од жени не се кривични дела според иранскиот закон. „Казната од 74 удари со камшик покажува дека состојбата со човековите права во Иран не се подобрила“, изјави претставничка на центар за човекови права. Колешки-актерки ѝ искажаа поддршка, опишувајќи го нејзиниот настап како будење на „духот на отпорот“.

Лесно е ова да се чита како далечна приказна од друг свет. Но суштината е универзална: жена казнета затоа што пеела како што сака, со гласот како единствено оружие. Историјата знае дека режимите што се плашат од песна на жена секогаш се плашат од нешто многу поголемо – и дека таквиот страв ретко завршува добро по оние што го создаваат.