Има една реченица што секој граѓанин ја слушнал барем еднаш од некој функционер: „Тоа не е во моја надлежност.” Сега, според опозициската Левица, истата реченица ја изговорил и градоначалникот на Струга, кога станало збор за криминалот со плажите на брегот на Охридското Езеро.

На последната седница на советот на општина Струга, градоначалникот Ќира, тврди Левица, скандалозно изјавил дека нема механизам со кој би ги отстранил лицата што со години незаконски ги окупираат и наплаќаат плажите. Со други зборови – проблемот постои, граѓаните го гледаат секое лето, но првиот човек на општината тврди дека неговите раце се врзани.

Прашањето што Левица го поставува, а со право, е едноставно: ако градоначалникот не е надлежен за тоа што се случува на јавните површини во неговата општина, тогаш кој е? Плажите на езерото не се ничија земја – тие се јавно добро, а нивната узурпација значи дека некој зема пари таму каде што не смее, додека институциите гледаат на друга страна.

Ова е класичен балкански модел на одбегнување одговорност: кога работите функционираат, секој сака да се слике; кога ќе се појави проблем, одеднаш никој не е надлежен. Езерото е под заштита на УНЕСКО, а неговиот брег со години се претвора во приватна каса за оние што се снашле. Колку лета уште ќе треба да поминат пред некој конечно да признае дека е „надлежен”?