Последните денови германските медиуми се преплавени со сензационалистички наслови за наводна „екстремна зима“ што, според пишувањата, би можела да ја погоди земјата во сезоната 2025/26. Дел од текстовите ја најавуваат „најстудената зима во историјата“, со слики од замрзнати улици и арктички сценарија — но метеоролозите предупредуваат дека ваквите прогнози се целосно неосновани.

Според „Deutsche Welle“, вакви медиумски шпекулации се појавуваат речиси секоја година – некогаш за „пеколно лето“, а некогаш за „ледена зима“ – со единствена цел да привлечат внимание и кликови.

Слаб поларен вртлог ≠ арктичка зима

Изворот на овие тврдења е напис што го поврзал слабиот поларен вртлог со можни арктички студови во Европа. Метеорологот Лотар Бок потврдува дека поларниот вртлог навистина може да биде нешто послаб, но тоа не значи автоматски дека ќе следи екстремна зима.

„Слаб вртлог не ја задржува студената воздушна маса над Арктикот, па таа може повремено да се спушти кон Европа,“ објаснува Бок, „но тоа не е правило.“ Слично мислење дели и Мартин Гад од метеоролошкиот центар ARD, кој вели дека не постои научно докажана врска меѓу слаб поларен вртлог и арктички студови.

Прогнозите за зимата 2025/26 – чиста шпекулација

Метеоролозите потсетуваат дека сигурна временска прогноза може да се даде најмногу 10 дена однапред. За три дена прогнозата е релативно прецизна, но што е подолг периодот, точноста брзо опаѓа.
„Мислиме дека можеме да ја предвидиме временската состојба 20 или 50 дена однапред, но тоа едноставно не е можно“, истакнува Бок од Германската метеоролошка служба (DWD).

Неговиот колега Карстен Шванке додава дека во октомври е „апсолутно невозможно сериозно да се зборува за тоа каква ќе биде зимата 2025/26“.

Екстремни зими – ретка појава

Историски гледано, навистина екстремно студени зими се случуваат приближно еднаш во сто години. Таква била зимата 1962/63, најстудената во 20. век, кога повеќето реки и езера во Германија биле целосно замрзнати.

Но, според експертите, веројатноста за повторување на слична зима во 2025/26 е многу мала. Затоа, заклучуваат метеоролозите, јавноста треба да се потпира на краткорочни прогнози, бидејќи „сè подалеку од десет дена е чиста хипотеза“.