Реката Вардар повторно стана жртва на човечката негрижа. Илјадници пластични шишиња и друг отпад запловија по водите кај Тетово, предизвикувајќи лавина реакции на социјалните мрежи. Видеото објавено од селото Копанце брзо се прошири, а јавноста бара одговорност за еколошката катастрофа.

Од Министерството за животна средина појаснуваат дека главната вина лежи кај локалните самоуправи, слабите комунални услуги, но и неефикасниот инспекциски надзор. „Во руралните средини се присутни бројни диви депонии, а за нивната санација и контрола се надлежни општините и комуналните инспектори“, соопштуваат од Министерството.

Од таму додаваат дека заедно со Државниот инспекторат за животна средина континуирано апелираат за засилено следење на состојбите на терен и повисока ангажираност на општинските служби.

Надлежните институции најавуваат измени на Законот за инспекциски надзор во животната средина, со кои ќе се воспостави поефикасен систем на контрола и казни, со цел спречување на вакви случаи во иднина.