Принцот Хари се враќа во Британија од 7 до 11 јули – но сам. Сопругата Меган и децата Арчи (7) и Лилибет (5) остануваат од другата страна на океанот. Патувањето првично било замислено како прва семејна посета по години, а сега се стопи на еден човек со куфер. Причината не е расположение ниту протокол – туку нешто многу поприземно: пари и полиција.

Британската влада одбила да плати полициска заштита за Меган и децата додека се во Лондон. Без таа заштита, безбедносниот тим на Хари едноставно ги прецртал од списокот. За едно семејство што со години повторува дека токму прашањето на безбедност го истерало од островот, ова е потврда дека нешто суштинско не се променило. Кога сопствената држава ти вели дека твоите деца не вредат колку да им се обезбеди придружба, тешко е тоа да се прочита како добредојде.

Во Лондон Хари има конкретна работа: состаноци за Invictus Games во Ројал Хоспитал Челзи и настан во Чатам Хаус на кој Уганда се објавува како 26-та земја учесничка. Ако безбедносните услови се подобрат кон крајот на неделата, Меган можеби ќе му се придружи за дел од програмата во Бирмингем. „Можеби” – зборот што ја опишува целата оваа врска подобро од секоја официјална изјава.

Најтивката, а најтешка бројка во приказната: кралот Чарлс III не ги видел своите внуци во живо од јубилејот на кралицата Елизабета во 2022 година. Четири години дедо и внуци се гледаат преку екран, ако воопшто. Дали ќе се сретнат овој пат зависи, повторно, од безбедносни дозволи – не од желба, не од крв, туку од хартија и распоред.

Хари лани рече дека „не гледа свет во кој би ја вратил жената и децата во Британија во овој момент”. Оваа посета е токму тоа – тој се враќа, семејството не. Кралските фамилии со векови ги решаваат своите скандали зад ѕидови, со молк и церемонија. Оваа се распаѓа на отворено, пред камери, објава по објава. А на крајот, како и секаде, најмногу губат оние што не одлучувале ништо – децата што дедо им е странец само затоа што возрасните не умеат да се договорат.