Прилеп се спрема за својата најголема летна забава. Од 17 до 19 јули, градот под Марковите кули ќе биде домаќин на 23-тото издание на „Пиво фест” – манифестација што одамна прерасна од локален настан во еден од најпосетените летни фестивали во земјава.

Градоначалникот Дејан Проданоски соопшти дека подготовките се во завршна фаза и дека градот е „максимално подготвен” да ги пречека гостите. Општинските екипи ги средуваат централното градско подрачје, плоштадот „Александрија”, парковите и зеленилото. Три вечери музичка програма, велат од општината, и „незаборавни моменти”.

Зад секое вакво соопштение стои и една реалност што вреди да се спомене. „Пиво фест” за Прилеп не е само забава – тоа е еден од ретките денови во годината кога градот полни хотели, кафеани и продавници, кога локалната економија добива вбризгување што ѝ треба. За град што со години се бори со иселување и затворени фабрики, три дена полни улици значат повеќе отколку што изгледа.

Прашањето што останува, како и секоја година, е дали еден фестивал може да го носи товарот на цела локална економија. Убаво е кога градот врие три вечери. Но што се случува во останатите 362 дена? Дотогаш, нека си ја има Прилеп својата пивска забава – заслужена е. А сметката за сето друго ќе стаса кога ќе стивнат тонколоните.