Уште еден стартап за ВИ видео собра неверојатна сума и се вивна во клубот на еднорозите. PixVerse, компанија со седиште во Сингапур, привлече 439 милиони долари (околу 400 милиони евра) во проширување на својата инвестициска рунда, а проценетата вредност сега надминува две милијарди долари. За фирма основана дури во 2023 година, тоа е скок за само две години што кажува колку пари се тркалаат наоколу штом ќе се спомене „вештачка интелигенција” и „видео”.

Зад PixVerse стојат Ванг Чангху, поранешен инженер за компјутерски вид во ByteDance (компанијата зад TikTok), и Џејден Ксие, кој доаѓа од светот на инвестициите. Меѓу инвеститорите во оваа рунда се и тешки имиња – Alibaba, Mirae Asset и низа азиски фондови. Пари, значи, не фалат.

Што нуди PixVerse? Алатки што од текст или слика создаваат видео со резолуција до 4K и звук, по цена од околу 4,80 долари за минута. Компанијата се фали со 150 милиони регистрирани корисници и 15 милиони активни месечно – бројки што звучат импресивно додека не се сетите дека „регистриран” не значи и „платен”. Колку од тие милиони навистина плаќаат, компанијата не открива.

Тука е и најинтересната изјава. На прашање што ги дели од конкуренцијата, Ксие рече: „Клучната разлика не е во податоците, туку во тоа како ги означуваш, бидејќи податоци има насекаде.” Искрено признание во индустрија каде сите тврдат дека имаат некаква тајна формула – всушност, тајната е дека нема голема тајна. Секој со доволно пари и инженери може да гради слични алатки, а разликата се сведува на детали и на тоа кој прв ќе го освои корисникот. Прашањето што останува виси во воздух: колку од овие двомилијардни проценки ќе преживеат кога музиката ќе застане?