На само неколку метри од изгорениот објект „Пулс” во Кочани, таму каде на 16 март 2025 година се одзедоа десетици млади животи, е осветен спомен-крст. Трајно обележје на местото на една од најтешките трагедии во поновата историја на градот.

Чинот на осветувањето, извршен по повод Петровден – празникот на Кочани – го изврши митрополитот Брегалнички Иларион, во сослужение со свештениците од Кочанското архиерејско намесништво. Крстот, висок 17 метри и широк 12 метри, е поставен на западниот влез во градот, кај кружниот тек во близина на локалитетот „Национал”. На настанот присуствуваа семејствата на настраданите, градоначалникот Владко Грозданов и голем број граѓани и верници, кои со заедничка молитва оддадоа почит.

Крстот е изграден со поддршка од Брегалничката епархија, општествено одговорни компании и Општина Кочани, која обезбеди проектна документација и одобрение за поставување на спомен-обележјето. По осветувањето, митрополитот Иларион отслужи помен за душите на настраданите и упати молитви за закрепнување на повредените и за сила на нивните семејства.

Спомен-обележјето ќе остане место за молитва и сеќавање. Но потсетувањето на болката е само едната страна. Другата – таа за која камен и крст не се доволни – е одговорноста. Зад секое ваква трагедија стои прашањето кое семејствата го носат секој ден: како воопшто беше можно, кој дозволи, кој потпиша, и дали некој навистина ќе одговара. Спомен-крстот сведочи за загубата. Правдата за настраданите е нешто што сè уште се чека, и тоа чекање не смее да заврши со ниту едно осветување.