Од 31 октомври до 2 ноември, Скопје повторно пулсираше во ритамот на иновациите и претприемништвото. Најголемиот стартап настан во земјата – Startup Weekend Skopje 2025, по осми пат по ред, собра повеќе од 45 учесници и 8 тимови – млади иноватори, програмери и претприемачи со заедничка цел: да создадат современи Fintech решенија што го менуваат начинот на кој ги доживуваме финансиските услуги.

Оваа година, темата беше насочена кон растечкиот Fintech сектор – синергија на финансии и технологија која овозможува поедноставно, побезбедно и поефикасно управување со финансии.
Од првите презентации во петок, па сè до финалните излагања во недела, енергијата, љубопитноста и желбата за успех беа неверојатни.

Fintech трендовите имаат потенцијал да создадат иновативни алатки што го менуваат начинот на кој размислуваме за финансиите. Со употреба на вештачка интелигенција, автоматизација и биометриски решенија, fintech ги поставува новите стандарди на модерните финансиски услуги.
На Startup Weekend-от, учесниците го користеа овој потенцијал преку развој на апликации за паметно буџетирање, автоматизација на трансакции и интеграција на одржливи практики.

54 часа креација и инспирација

Во текот на повеќе од 54 часа, идеите прераснаа во прототипи, а предизвиците се претворија во можности. Секој тим покажа што може да се постигне кога идеите ќе се спојат со тимска работа и кога заедницата верува во создавање нешто поголемо.

Настанот беше реализиран со поддршка од ProCredit Bank Macedonia и Mastercard, кои веќе трета година по ред ја поддржуваат fintech патеката и вложуваат во новата генерација иноватори.
Дополнително, 17 ментори од сферата на fintech, финансии и претприемништво им помагаа на учесниците да ги обликуваат своите идеи и да ги претворат во функционални решенија.

Жирито, составено од Ана Николова (ProCredit Bank Macedonia), Јасен Димитров (Mastercard), Катерина Бошевска (EOS Matrix Macedonia), Филомена Пљаковска-Аспровска (CaSys) и Сашка Костовска-Длака (Input dooel), ги оцени идеите според нивниот иновативен пристап, општествен импакт и пазарен потенцијал.

1. место – Edu Pari
Апликација што преку забавен и адаптиран метод ја зголемува финансиската писменост кај различни возрасни групи. Edu Pari им помага на луѓето да донесуваат паметни и информирани финансиски одлуки – нешто особено важно во време на чести измами и лошо менаџирање со пари.

2. место – DebtNet
Решение за наплата без директни плаќања, преку повеќестрани компензации. DebtNet ги олеснува финансиските односи и ги намалува проблемите со побарувања – практично и паметно решение за компании и поединци.

3. место – Jointly
Нов fintech концепт за парови, кој нуди дигитално искуство за градење финансиска доверба и транспарентност. Jointly им овозможува на паровите да започнат заеднички живот со поголема сигурност и транспарентност.

Startup Weekend Skopje 2025 уште еднаш покажа дека кога се спојуваат енергија, идеи и технологија, се создава нешто навистина вредно.
Честитки до сите учесници за нивната креативност, храброст и иновативен дух – и со надеж дека овие идеи ќе продолжат да растат и да се претворат во одржливи fintech бизниси кои ќе ја обликуваат иднината на финансискиот екосистем во Македонија.