Невремето што го погоди Штип помина пред околу една недела. Ветер од 134 километри на час го однесе покривот на Клиничката болница. Денес, речиси десет дена подоцна, покривот сè уште е оштетен, а на болницата ѝ се преземени само привремени мерки за заштита од нови врнежи.

Заменик-директорката на болницата, Билјана Ефтимова, вели дека прелиминарната проценка на штетата се движи во неколку милиони денари. Точната бројка сè уште не е позната – се чека извештај од осигурителната компанија.

Најпогодени се одделенијата на најгорните катови

Штетата не е козметичка. Најсериозно е оштетен покривот и третиот кат, каде што се сместени ортопедските одделенија и интензивната нега. Односно, оние места во болницата каде што лежат пациенти кои најмалку можат да бидат преместени во случај на протекување.

Досегашните санации се делумни. Трајното решение бара целосна замена и реконструкција на оштетените делови. До тогаш – секој нов дожд е ризик за одделенијата на најгорните катови.

Проектна документација наместо покрив

Раководството на болницата подготвува проектна документација и финансиска процена, со цел да побара помош од Министерството за здравство и од Владата. Министерот за здравство Сашо Клековски ја посети болницата и вети дека министерството ќе ја следи состојбата и ќе одвои буџетски средства за навремена санација, за да се вратат ортопедските услуги.

„Навремена санација.” Зборот е убав. Но десет дена по невремето, она што постои на терен е проектна документација во изработка, чекање на извештај од осигурителна компанија и ветување дека ќе се следи состојбата.

Тука не станува збор за инвестиција што бара студија за оправданост. Станува збор за покрив на болница. Кога проектната документација стигне пред буџетот, кога буџетот стигне до тендер, а тендерот до изведувач – колку врнежи ќе поминат преку тие одделенија?

Ефтимова беше прецизна: штетата дефинитивно ќе биде во милиони денари, што е сигурно многу. Прашањето кое останува во воздух е дали ќе се плати само покривот – или и цената на одложувањето.