Три премини, три различни слики

Во недела навечер, кога половина Македонија се враќа од море, границата кон Грција не изгледа исто на сите три премини. На Богородица се чека во колона – две ленти полни, светла на кочници до бариерата. На Стар Дојран истата слика, со камиони измешани меѓу автомобилите. На Меџитлија, во истиот момент, сообраќајот се движи.

Тоа е причината зошто „каква е границата” е погрешно прашање. Границата не е едно место, туку три, и разликата меѓу нив во ист час знае да биде час и половина возење.

Кога навистина се чека

Двата термина што најмногу боли се предвидливи: недела попладне кон дома и сабота наутро кон Грција. И во двата случаја реално се чека од еден до три часа. Не затоа што системот паднал, туку затоа што сите тргнуваат во исто време.

Наместо да се погодува, камерите на трите премини се јавно достапни и се гледаат во живо. Пет секунди гледање пред да се седне в кола вреди повеќе од кој било совет.

Што мора да е во колата

Зелен картон, меѓународна возачка дозвола и опремата – противпожарен апарат, сигурносен триаголник и комплет прва помош. Ова не се препораки. Без апарат казната е 80 евра, без триаголник од 40 до 80 евра, а без меѓународна возачка може да стигне до 300 евра.

Меѓународната возачка е местото каде најмногу луѓе паѓаат. Грција е една од ретките земји каде македонските возачи мора да ја имаат, а без неа осигурувањето може да ја оспори штетата при незгода.

Колку чини патот

Патарините од границата до Солун се околу 3 евра. До Атина вкупно околу 40 евра во една насока. Горивото во Грција е по околу 1,97 евра за литар. Тоа се бројки што вреди да се пресметаат пред тргнување, не на прва бензинска.

Целиот водич – камерите во живо, времето на чекање, документите и трошоците – стои на едно место и се ажурира.