Маршот започна во 12:05 часот од плоштадот „Македонија“ и мирно се движеше до Кривичниот суд, поддржан од голем број граѓани. Напред беше носен голем транспарент со фотографиите на жртвите и натписот: „63 сенки ќе ве следат – секој поглед бара правда“.
Покрај него, учесниците носеа пораки како: „Тишината е соучество“, „Профит во крв“, „Крени го гласот пред да е касно“, „Ние родителите скапо го плативме данокот на корупцијата“.

Во обраќањето пред Собранието, Наталија Ѓорѓиеска, сопруга на загинатиот пејач Андреј Ѓорѓиески од ДНК, побара надзорна расправа и формирање анкетна комисија, нагласувајќи дека истрагата останала нецелосна, со многу недоразјаснети околности. „Имаме право на вистина. Ние семејствата останавме со сомнеж дека вистината е сокриена,“ рече таа.

Длабоко потресно сведоштво даде и родител на едно од загинатите деца, повикувајќи на сплотеност и борба: „Живеам само за борбата за правда, живеам за борбата мојот син Александар да знае од кого погинал. Не смеам да умрам додека нема правда.“

Протестот го организираа здружението „16 Март 2025“ и иницијативата „Кој е следен“, чиј претставник Борјан Ефтимов жестоко ги критикуваше институциите за одмолкот и неажурноста: „Не можеа да соберат мнозинство ниту за јавна расправа. Подобро да не се вратеа од одморот.“

Пред Кривичниот суд одекнуваа скандирања „Правда за Кочани“. Семејствата повторно побараа транспарентно и брзо судење. „Нашите најмили не се меѓу нас, но нивната судбина не смее да биде скриена зад пропусти или политички интереси. Ние сме нивниот глас и ќе остане јасен и непоколеблив“, изјави Розеа Џамова, сестра на загинатиот Јорданчо Џамов.

Судењето, во кое обвинети се 35 физички лица и три компании, започнува за неколку дена. Судот, обвинителството, адвокатите и медиумите веќе ги финализираат подготовките за процесот кој го следи цела држава.