Европол предупредува: Криминалните мрежи ги претвораат децата во „оружје“ преку видео игри и интернет

Криминалните мрежи во Европа развиваат опасен модел на регрутирање деца, користејќи ги онлајн мултиплеер игрите и паметните телефони како алатки за манипулација и принуда. Шефицата на Европол, Катрин Де Бол, предупредува дека овие групи ги „претвораат децата во оружје“ – присилувајќи ги да вршат тортура, насилство и дури убиства.

Според Де Бол, криминалните организации станале најголема безбедносна закана за Европската Унија, токму поради тоа што ги таргетираат најранливите – малолетниците.

„Децата се користат за мачење или убивање. Не зборуваме повеќе за ситни кражби, туку за тешки злосторства“, истакнува таа, наведувајќи го случајот кога на тинејџер му било наредено да ја убие својата сестра – наредба што тој ја извршил.

Европол има евидентирано 105 случаи на малолетници вклучени во насилни дела по налог на криминални групи, меѓу кои и 10 договорени убиства. Процесот на регрутирање често започнува со безопасен разговор во игра, кој брзо преминува во приватни пораки, уцени и барање лични податоци.

Криминалците применуваат брутални методи на уцена – од закани до убивање миленици, само за да ги натераат децата да извршат одредена задача. Таргетирани не се само ранливи деца, туку и тинејџери без проблеми, па дури и оние што сакаат брза заработка или скапи предмети.

Де Бол предупредува и на растечките хибридни закани – од користење деца како „несвесни шпиони“, до злоупотреба на вештачка интелигенција за измами, дипфејк содржини и нелегална трговија со дрога.

Криминалните мрежи, вели таа, ги „индустријализираат“ методите, што бара итна акција и пристап до шифрирани комуникации со судско одобрение.

„Тоа е иднината на Европската Унија. Ако ја изгубиме, губиме сè“, завршува Де Бол.