Во две метални сеф-каси скриени во спуштен плафон во приватен дом се пронајдени 86.200 евра и 16 плочки со златна боја. Во возилото на истиот човек – уште 6.465 евра и 62.000 денари. Ова не е сцена од филм, туку дел од заплената во акцијата во која Обвинителството за гонење организиран криминал отвори истрага против осум лица.

Во групата има и царински службеник.

Како функционирала шемата

Според доказите обезбедени во постапката, во периодот од 2024 до 2026 година првоосомничениот преку царинската линија пренесувал непријавени цигари и тутун, избегнувајќи ја контролата. Во тоа, според истрагата, му помагале повеќе лица – меѓу кои и царинскиот службеник, кој го информирал за своите смени, за лентата на која бил распореден и за засилените царински контроли.

Дел од истрагата се однесува на конкретен случај на поткуп на граничниот премин Богородица. Постои основано сомнение дека на службеникот му биле ветени пари за да не изврши контрола на возило во кое се пренесувале цигари. Тој го прифатил ветувањето и го пропуштил возилото, а во предавањето на парите посредувал турски државјанин, шестоосомничен во случајот.

Од цигари до „машка сила“

Паралелно со тутунот, групата се занимавала и со нелегална трговија со лекови. При претресите биле пронајдени големи количества препарати за дијабетес, срцеви и кардиоваскуларни заболувања, невролошки и психијатриски состојби, ревматолошки и автоимуни заболувања, како и антибиотици, кортикостероиди и хормонски лекови. Плус целата палета производи за потенција – таблети, гелови, пасти, мед и чоколада.

Министерот за здравство Сашо Клековски појасни дека во центарот на акцијата се токму суплементите и препаратите за потенција, и дека станува збор за производи кои не се регистрирани во земјава. „Во прашање не се лекови, туку додатоци и надрилекарства… сите заедно се поврзани со сузбивање на шверцот и нелегалната трговија на лекови и суплементи и други средства кои предолго време претпоставувам биле толерирани, а може да доведе до големи несакани последици“, изјави тој.

„Предолго време толерирани“

Таа реченица на министерот е најважното нешто што беше кажано околу целиот случај, и најмалку коментираното. Не станува збор за производи што некој ги внел криумчарски во еден куфер. Станува збор за производи што се продавале – според сознанијата на истрагата, низ повеќе градови – доволно долго за министерот јавно да каже дека некој ги гледал и не реагирал.

Кој ги толерирал? Истрагата се однесува на двегодишен период и на осум лица. Инспекциските и царинските служби што требале да ја забележат шемата функционираат подолго од две години и имаат многу повеќе од осум вработени.

Што следува

Поднесена е кривична пријава против осум лица од Тетово, Гевгелија, Скопје и двајца државјани на Турција, за повеќе кривични дела меѓу кои шверцување, прикривање стоки кои се предмет на шверц, избегнување плаќање акциза, примање и давање поткуп, производство и пуштање во промет штетни средства за лекување. На првоосомничениот му се става на товар и перење пари.

За тројца осомничени обвинителот побара притвор, за тројца мерки на претпазливост. Двајца во моментов се недостапни за органите на прогонот. Одземените предмети, цигари и пари одат на вештачење.

Заплената е импресивна и заслужува да биде. Но сефот во спуштениот плафон не се полни преку ноќ – тој е резултат на две години во кои системот што требало да ја види шемата, не ја видел.