Општина Центар за една недела проверила десет активни градилишта. Од нив шест добиле казна од по 1.300 евра, поради нарушување на комуналниот ред и непочитување на Законот за јавна чистота. На три локации се отстранети блокатори и столпчиња бесправно поставени на јавни површини – оние метални парчиња со кои граѓани и фирми самоволно си резервираат паркинг на тротоарот.

Контролите се вршени и во доцните попладневни часови, кога градежната активност стивнува, а последиците врз јавниот простор стануваат највидливи: прашина, разнесена кал, затнати тротоари.

„Инспекциските служби се на терен. Покрај редовните надзори, спроведуваме и вонредни контроли за заштита на животната средина, спречување на загадувањето, одржување на јавната чистота и обезбедување безбедни тротоари и улици. Нема да толерираме нарушување на јавниот простор“, порача градоначалникот на Центар, Горан Герасимовски.

Досега добро. Сега за бучавата.

Истата општина неодамна се пофали дека е првата во државата која им овозможува на граѓаните директен дигитален увид во мерењата на бучавата. Поставени се 30 апарати на локациите каде центарци најчесто пријавувале проблем, а мерењата се достапни преку општинскиот ГИС-портал. Секое мерење е обележано со боја – црвено значи надминување на законската граница.

Звучи како вистински чекор. Тука почнува проблемот.

Тие мерења не се доказ. Од Општината појаснуваат дека податоците од мониторингот се индикативни – информација дека некаде е прегласно, но не и основа инспекторот да излезе и да казни. За да се стигне до казна, граѓанинот мора физички да поднесе пријава во општинската Архива.

Архивата не работи за викенд

И тука конструкцијата се распаѓа сама од себе.

Најмногу забави низ локалите има во сабота навечер. Најмногу надминувања на границите за бучава – исто тогаш. Граѓанинот што во сабота во полноќ ќе го отвори ГИС-порталот и ќе види црвена точка над својот кров, држи во рака документ што не вреди ништо додека не го однесе во Архивата. А Архивата работи во понеделник.

Дотогаш инспекторите не можат да излезат. Кога и ќе излезат, тоа може да биде два или повеќе дена откако музиката свирела.

Граѓаните, впрочем, на порталот ја гледаат само бучавата измерена од претходниот ден. За целата општина, за оваа проблематика се задолжени двајца инспектори.

Резултатот: два казнети локали

Од 1 јануари до денес, според Општината, направени се повеќе мерења на бучавата. Дел не ја надминувале законската граница. Дел добиле усни опомени поради „прва грешка“. На неколку локали им биле издадени решенија со мерка за намалување на бучавата и покривање на трошоците.

Казнети се – два локала.

Од граѓанската иницијатива „За пристоен Капиштец“, која пред три месеци организираше протест токму поради гласната музика, реагираа остро: „Конечно проработеа мерните станици за бучава. Очекуваме градоначалникот да го претстави како уште еден негов успех, а всушност е комплетен пораз – нема едно мерно место каде што е измерена бучава во рамките на законски предвидените граници. Сега имаме официјален доказ за бучавата, законот овозможува инспекторот да изрече забрана за вршење дејност на оние кои тероризираат!“

Двата случаи ја кажуваат истата работа

Шест градилишта платиле по 1.300 евра затоа што инспекторот дошол, видел и напишал. Тоа функционира.

Кај бучавата, општината купи 30 апарати, ги постави, ги поврза со портал и им ја отвори базата на граѓаните – и потоа направи сопствените податоци неупотребливи за сопствените инспектори. Тоа не е недостиг од технологија. Тоа е процедура што ја поништува технологијата.

Триесет уреди мерат во реално време. Одлуката се носи според хартија однесена во понеделник.