Претседателот на Собранието, Африм Гаши, денеска престојува во Ријад, во Кралството Саудиска Арабија. Во делегацијата се Никола Мицевски, координатор на ВМРО-ДПМНЕ, Оливер Спасовски, координатор на СДСМ, и Аднан Азизи, заменик-координатор на Влен. Владејачкото мнозинство и опозицијата, на ист пат.

Делегацијата ќе се сретне со својот „хомолог“, шеикот д-р Абдула бин Мухамед бин Ибрахим Ал-Шеик, претседател на Консултативниот совет (Шура), како и со пратеници и членови на Групата за пријателство. Ќе присуствува и на пленарна седница на Советот на Шурата.

Зборот „хомолог“ тука носи повеќе товар отколку што изгледа. Собранието го бираат граѓаните на избори. Членовите на Шурата ги именува кралот, а советот има советодавна улога во апсолутна монархија. Тоа не значи дека не треба да се разговара, дипломатијата се води и со држави што не личат на нас.

Но кога претседателот на Собранието на пат ги носи координаторите на три партии, граѓаните имаат право да знаат по што се оди: кои теми се на маса, што се очекува да се договори и кој ја плаќа посетата. Во соопштението за посетата нема одговор на ниту едно од тие прашања.