Унгарскиот модел Барбара Палвин и актерот Дилан Спраус станаа родители на девојче. Веста не стигна преку прес-соопштение ни преку насловна страница на магазин, туку преку една фотографија на социјалните мрежи: тројцата, облечени во дресови на Лос Анџелес Доџерс, седат пред телевизор на кој оди бејзбол натпревар.

Потписот е шега што бара мало објаснување. „Оваа година Денот на трудот го сфативме буквално“, напиша Палвин. Во САД Денот на трудот се слави првиот понеделник во септември, а годинава тоа беше 7 септември – што значи дека бебето е родено пред околу три недели. На македонски шегата речиси се преведува сама: трудот е труд, без разлика што пишува во календарот.

Бременоста ја објавија во мај, на Канскиот филмски фестивал, каде Палвин се појави во небесносин фустан со квадратно деколте и долго здолниште што завршуваше со пердуви. Во јули, во подкастот „Wildmen“, открија дека чекаат девојче.

Спраус тогаш не го криеше воодушевувањето. „Ќе имаме девојче, и тоа ме радува неизмерно“, рече тој, додавајќи дека едвај чека „бескрајни попладниња со игри“ и дека сака забави со чај, „без никаква иронија“. Палвин, пак, предвиде дека ќерката ќе го смири нејзиниот сопруг.

Во месеците пред раѓањето двајцата бебето го викаа „principessa“ – принцеза на италијански. Претходно објавија и ехографија на која, според родителите, бебето ја држи раката во знакот на рокенролот, со кренат показалец и мал прст. Доказ, велат, дека ќерката веќе ја дели нивната музичка страст.

Во свет каде првите фотографии од бебињата на ѕвездите често се чуваат за ексклузиви, семејство што најголемата вест во животот ја соопштува од каучот, со бејзбол во позадина, делува речиси бунтовно. Колку долго ќе трае таа приватност е друго прашање.