Министерството за здравство, во соработка со Универзитетската клиника за пулмологија и алергологија, организира дводневен скрининг на населението во Трубарево и околните места, по неодамнешниот пожар во објект за електронски отпад.

Акцијата започна денеска и ќе продолжи и утре, 24 и 25 септември. Скринингот го реализираат две мобилни екипи од Клиниката за пулмологија со амбулантни возила. Прегледите се бесплатни и се наменети за сите жители, а особено за оние кои чувствуваат потешкотии при дишењето или имаат симптоми поврзани со заболувања на респираторниот систем.

Министерот за здравство Азир Алиу објасни дека граѓаните ќе добијат комплетен клинички преглед, спирометрија, ЕКГ и други потребни испитувања. Доколку се појави потреба, дополнителните анализи ќе бидат извршени веднаш на лице место или пациентите ќе бидат упатени на Клиниката за пулмологија.

„Нашата цел е да обезбедиме навремена и врвна здравствена грижа за сите граѓани“, рече министерот Алиу. Директорот на Клиниката, Оливер Зафировски, додаде дека ова е почеток на една значајна акција, затоа што здравјето на граѓаните е на прво место.

Со скринингот се овозможува навремено откривање на евентуални последици врз здравјето од изложеноста на чадот и токсините од пожарот, со цел обезбедување на соодветна заштита и третман.