Од 1 јануари, покрај синдикалната минимална потрошувачка кошничка, и Владата ќе започне со официјална пресметка на просечната потрошувачка кошничка на ниво на државата. Ова го најави заменик-министерот за економија и труд Марјан Ристески, посочувајќи дека новата кошничка ќе се однесува на најмалку четиричлено семејство и ќе служи како основа за креирање економски политики и заштита на животниот стандард.

Според најавите, пресметката ќе се врши врз основа на цените од најголемите супермаркети во земјава, како и на основните прехранбени производи и други неопходни трошоци за просечно македонско семејство. Ќе се земаат предвид и регионалните разлики, а овошјето и зеленчукот ќе се пресметуваат според сезонската достапност.

Ристески истакна дека ова нема да биде единствената официјална кошничка и дека во иднина се планира пресметка и за двочлено и тричлено семејство, како и за пензионери. Овие прашања ќе се разгледуваат во рамките на Економско-социјалниот совет.

Синдикалната минимална кошничка, која ја пресметува Сојузот на синдикати на Македонија од 2011 година, и понатаму ќе остане релевантен показател за реалните трошоци за живот, при што ССМ смета дека таа подобро ги отсликува потребите на едно домаќинство.