Администрацијата на Град Скопје во наредната година треба да се прошири со вкупно 94 нововработени, покажува Годишниот план за вработувања што ќе се најде пред советниците на седницата закажана за идниот четврток. Од нив, 50 вработувања се предвидени во Бригадата за противпожарна заштита, додека 44 нови позиции се планирани во градската администрација поради, како што се наведува, зголемен обем на работа.

Сите нови вработувања ќе бидат на неопределено време. Со оглед на тоа дека Град Скопје моментално има 662 вработени, а во пензија наредната година заминуваат само седум лица, планираното зголемување значи раст на администрацијата од околу 7 проценти.

Новото градско раководство планира да вработи 13 раководители на одделенија и сектори, како и повеќе помошници на раководители, советници, референти и соработници. Дополнително, предвидени се и двајца комунални инспектори и двајца обезбедувачи на објекти.

Платите за новите вработени се веќе вградени во предложениот буџет. Најголемиот дел од раководителите ќе имаат годишна плата од 592.840 денари, односно околу 49.400 денари месечно, додека највисока плата е предвидена за раководителот на Секторот инспекторат – 882.590 денари годишно, или околу 73.550 денари месечно.
Најниски примања ќе имаат обезбедувачите, со плата од 37.000 денари месечно.

Посебен акцент е ставен на Бригадата за противпожарна заштита, каде состојбата со кадарот е алармантна. Според Законот за пожарникарство, Скопје треба да има најмалку 384 пожарникари, но моментално се вработени само 199, што значи дека недостигаат 185 пожарникари. Дополнителен проблем е и старосната структура, поради која во наредните години се очекуваат нови пензионирања.

Во рамки на новите 50 вработувања во Бригадата, предвидено е ангажирање на 29 пожарникари, 15 возачи на противпожарни возила, четворица командири на вод и двајца автоелектричари.

За 44-те нови вработувања во градските сектори, во образложението до советниците се наведува дека тие се неопходни за непречено функционирање на институцијата, иако официјално е потврдено дека само седум работни места ќе се испразнат по основ на пензионирање.