Собранието вечерва, на продолжението на 67. седница, го усвои Законот за средно полициско училиште, со што по пауза од четврт век повторно се воведува ваков тип на образование за идните полициски службеници. Законот беше донесен со Бадентерово мнозинство, а расправата за него беше завршена претходно.

Со новото законско решение се воспоставува јасна правна рамка за формирање и функционирање на средно полициско училиште, кое ќе работи во рамки на постојниот Центар за обука во Идризово, согласно новиот Закон за внатрешни работи – Полициска академија.

Образованието ќе трае две учебни години, односно трета и четврта година од средното образование. Учениците ќе можат да се пријават по завршување на прва и втора година во редовно средно училиште, преку јавен конкурс, и доколку ги исполнуваат условите, да го продолжат школувањето во полициското училиште.

Паралелно со средното полициско образование, според потребите на Министерството за внатрешни работи, ќе продолжи да се спроведува и досегашната едногодишна основна обука за полицаец.

Во образложението на законот се наведува дека анализите од досегашната пракса и искуствата од земји каде што веќе постои ваков модел – како Србија, Хрватска, Босна и Херцеговина, Чешка и други – покажуваат дека иако со средното полициско образование се создава помал број кадри, се постигнува повисок квалитет.

Дополнително, се нагласува дека кандидатите се запишуваат на помлада возраст, односно на 15 или 16 години, за разлика од сегашниот модел на основна полициска обука, каде кандидатите се на возраст од 18 до 25 години, што овозможува подолг и посистематски образовен процес.

Последната генерација ученици во Средното полициско училиште дипломираше во 2000 година, а со новото законско решение ќе продолжи образувањето на 25-тата генерација идни полициски службеници.