Стојна од Кратово пак приведена кај Куклица: наплаќала влез и им се заканувала на двајца скопјани

На 27 октомври во 11:30 часот полицијата од ОВР Кратово ја приведе 41-годишната Стојна Димитровска од Кратово. Според пријавата на двајца скопјани, Р.П. и Ј.Б., таа се обидела да им наплати билети за влез во локалитетот „Камени кукли“ кај Куклица, а потоа им се заканувала. По целосното документирање на случајот, против неа ќе следува соодветна пријава.

Ова е реприза, не премиера. Димитровска и претходно била приведувана поради наплата на влезници на „Камени кукли“. Од МВР претходно соопштија дека против неа, нејзиниот татко Милош и нивното здружение е поднесен обвинителен акт за узурпација на недвижности, а против Стојна има и казнен налог поради закани кон туристи. Посетители јавно се жалеле дека, кога ќе одбијат да платат, следувале агресија, камења и пуштени кучиња.

Општина Кратово тврди дека просторот е бесправно узурпиран, а истовремено се правда дека и самата не може да обезбеди пристап до локалитетот. Во јавноста кружат и спротивни тврдења: дека локалитетот е на приватно земјиште, дека пристапот минува преку приватен имот и дека Димитровска добивала грантови од ЕУ за уредување. Ако тие тврдења се точни, прашањето не е само кој наплаќа, туку и кој има право.

Тука е суштината. Еден од најпрепознатливите природни споменици во Македонија со години функционира како спорна парцела, за која јавноста дознава главно од полициските билтени. Кој е сопственик на земјиштето? Кој има законско право да управува со локалитетот? И дали Општината има правен основ за своите постапки? Додека институциите не одговорат, туристот што ќе тргне кон Куклица не знае дали плаќа билет или откуп.