Зошто се иселуваат младите? Словенија како пример, а исто е и со другите држави. Македонија има ВМРО и СДСМ!

Додека Македонија со години зборува за спречување на иселувањето на младите, Словенија одамна разбрала нешто што нашите институции очигледно не успеваат да го разберат – највредниот капитал на една држава не се зградите, патиштата и фабриките, туку образованите луѓе.

Словенија им овозможува на македонските студенти бесплатно студирање на голем дел од своите јавни универзитети, а преку различни програми и поволности им се олеснуваат и условите за сместување и студентски живот.

Словенија инвестира во иднината, а Македонија ја губи сопствената.

Меѓу младите Македонци кои заминуваат да студираат во Словенија има исклучително талентирани ученици, носители на награди, одлични средношколци и млади луѓе со огромен потенцијал.

Тоа се генерации во чие образование македонското општество веќе вложило средства, од основното до средното образование.

Токму во моментот кога тие млади луѓе треба да го направат најважниот чекор во своето професионално оформување, Македонија почнува да ги губи.

Словенија им нуди образование, европска перспектива, подобро организиран систем и можност за професионален развој.

Додека Словенија им ги отвора вратите на македонските студенти, Македонија доделува стипендии за студирање во странство кои можат да достигнат и до 40.000 долари годишно само за школарина.

Нека собере државата храброст и нека ги објави сите стипендии што ги доделила за студирање во странство. Нека каже колку милиони евра од народните пари се потрошени, кому му се доделени, во кои држави студирале стипендистите и колку чинело нивното образование.

Но, уште поважно, нека објави колку од тие студенти се вратиле во Македонија, колку денес работат овде и колку од нив својата иднина ја изградиле во други држави.

Јавно достапни списоци на добитници и точните износи што државата ги исплатила нема , се знае дека за десет години исплатени се 11.000.000 долари!

Еден од ретките јавно познати случаи е Јана Димитрова, ќерка на поранешниот министер Никола Димитров, која добила државна стипендија за студирање во Холандија.

Во 2018 година  Јана Димитрова, ќерка на тогашниот министер за надворешни работи Никола Димитров, добила државна стипендија за студирање на Универзитетот во Утрехт, Холандија.

Според објавените информации:

• Одлуката била донесена на 4 август 2017 година.
• Комисијата била формирана истиот ден кога одлучувала за барањето.
• Стипендијата била во рамки на програмата на МОН за студирање во странство.
• Максималниот износ бил 40.000 американски долари годишно.

МОН потврдило дека Јана ги исполнувала критериумите и дека немало привилегирање. Министерството појаснило и дека парите за школарина се исплаќаат директно на универзитетот, до максималниот дозволен износ.

По завршувањето на студиите, тие можат да станат инженери во словенечките компании, лекари во словенечките болници, истражувачи во научните институти или претприемачи што ќе создаваат нови работни места.

Со други зборови, Словенија денес образува луѓе кои утре можат да бидат столб на нејзиниот економски и општествен развој.

Македонија го плаќа нивното детство и образование, а други држави го добиваат нивниот потенцијал

Македонија со години инвестира во образованието на своите деца.

И тогаш доаѓа Словенија.

Им отвора врата, им овозможува образование и им покажува дека постои поинаков систем.

А Македонија останува да се прашува зошто младите си заминуваат.

Најголемата загуба не е заминувањето – туку невраќањето

Млад човек кој на 18 или 19 години заминува во Словенија, таму ги поминува најважните години од своето оформување.

Таму стекнува пријатели, создава професионални контакти, го учи јазикот, ја запознава културата и постепено станува дел од општеството.

По четири или пет години, Словенија за него веќе не е само земјата во која студирал.

Таа може да стане негов втор дом.

Таму може да ја добие првата работа, да создаде семејство, да купи стан и да ја планира својата иднина.

И тогаш прашањето повеќе не е зошто заминал.

Прашањето е зошто би се вратил?

Што му нуди Македонија за да се врати?

Повисока плата? Подобри услови? Сигурна кариера? Почитување на неговото знаење? Функционални институции?

Или само патриотски говори и повици младите да ја сакаат својата татковина?

Словенија добива иднина, Македонија губи генерации

Секој образован млад човек кој трајно ќе замине претставува загубен потенцијал за македонската економија.

Тоа е еден инженер помалку во домашната индустрија, еден лекар помалку во здравството, еден научник помалку во истражувањето и еден потенцијален претприемач помалку во економијата.

Но загубата не завршува тука.

Со секој млад човек што трајно заминува, Македонија потенцијално губи и идни семејства, идни деца, идни даночни обврзници и идни генерации.

Така иселувањето постепено станува не само економски, туку и демографски проблем.

Словенија не мора да ги убедува македонските студенти да ја заборават својата татковина. Доволно е да им понуди услови во кои ќе посакаат да останат.

А Македонија?

Македонија продолжува да зборува за задржување на младите, додека други држави создаваат услови да ги привлечат.

И тука се крие најголемиот пораз на нашите политики.

Не е најголемата трагедија што Словенија знае да ги привлече нашите најдобри млади луѓе.

Трагедијата е што Македонија не знае како да ги задржи.