Охриѓани ќе плаќаат 16 отсто поскапа вода до 2029: Водовод вели дека е неизбежно, опозицијата вели удар врз џебот

Владејачкото мнозинство во Советот на Општина Охрид изгласа нов тригодишен тарифник за водата. До 2029 година цената на водата за пиење ќе порасне вкупно 16 отсто, а за правните лица 20 отсто. Во пракса тоа значи 3 денари повеќе по кубен метар. За семејство што троши меѓу 10 и 15 кубици, сметката од 1 јануари ќе биде повисока за околу 40 денари.

Од охридскиот „Водовод“ велат дека поскапувањето е неизбежно и усогласено со тарифникот на Регулаторната комисија за енергетика. Тоа е стандардниот одговор: не сме ние, е регулаторот. Но одлуката на крајот ја изгласа Советот, не регулаторот.

Советничката на Левица Аврамоска гласаше против. „Веќе како да ви стана навика секоја година да ги покачувате цените во јавните претпријатија“, им порача таа на мнозинството. Според неа, во мандатот на градоначалникот Пецаков и локалната власт на ВМРО-ДПМНЕ ЈП „Градски пазар“ ги поскапило услугите за 35 отсто, паркинг-услугите за 40 отсто, а гробарината и гробните места за 75 отсто. Сега и „Нискоградба“ ги поскапува услугите за собирање и одведување отпадни води за 2 отсто.

Ниту една од овие ставки посебно не е катастрофа. Но граѓанинот не ги плаќа посебно. Водата поскапува токму кога ЕСМ пресметува нова цена по која од јануари ќе ја продава струјата на „ЕВН Хоум“, а МЕПСО побарал зголемување на преносната тарифа за над 98 отсто, со напомена од регулаторот дека тоа не значи автоматски толкаво зголемување на сметките.

Опозицијата ја нарече одлуката нов удар врз џебот на граѓаните во зима, кога и останатите давачки растат. Претпријатието вели дека нема избор. Кога сите мали поскапувања ќе се соберат на една маса, дали некој во Советот ќе ја пресмета вкупната сметка за едно охридско домаќинство?