Големо свлечиште кое вчера се активираше на регионалниот пат Новаци – Маково, во близина на депонијата Мегленци, целосно го уништи коловозот и го прекина сообраќајот на оваа делница. На снимките објавени на социјалните мрежи јасно се гледа како асфалтот е пресечен, а огромна количина земја се одронила надолу.

Среќна околност е што во моментот на одронувањето на патот немало возила или пешаци, со што е избегната можна трагедија.

Градоначалникот на Општина Новаци, Стевче Стевановски, информираше дека состојбата е сериозна и дека веќе се преземаат итни мерки за санација. Како што соопшти, на терен интервенираат екипи на РЕК Битола и Јавното претпријатие за одржување на патишта, со цел стабилизирање на теренот и спречување на понатамошно ширење на свлечиштето.

Овој настан доаѓа само неколку недели по регистрирањето на голема пукнатина и активно свлечиште во атарот на Липково, кое тогаш претставуваше директна закана за безбедноста на локалното население. Жителите и тогаш апелираа до институциите за итна интервенција поради забрзаната ерозија на земјиштето.

Се почести вакви појави повторно го отвораат прашањето за состојбата на патната инфраструктура и потребата од системско следење и навремена превенција на свлечишта во ризичните подрачја.

https://www.facebook.com/share/r/1AULd2NAAP/