Докторка по медицина, која освоила најмногу бодови на јавен оглас за вработување во Општата болница „Д-р Ферид Мурад“ во Гостивар, не добила договор на неопределено, иако била прворангирана на листата на кандидати.

Станува збор за оглас објавен на 28 декември 2023 година, со кој болницата барала вработување на 10 доктори на медицина, 10 медицински сестри, 3 физиотерапевти, еден рентген-техничар и еден биохемичар. Докторката навремено се пријавила за позицијата „доктор на медицина“ и по спроведените тестирања – стручен испит и испит по странски јазик – се пласирала на првото место со 84,40 бодови.

И покрај тоа, по спроведеното интервју со кандидатите, директорот на болницата донел одлука за вработување на 10 други доктори, додека прворангираната кандидатка останала без договор на неопределено и продолжила да работи со договор на дело.

Докторката поднела жалба до Државната комисија за одлучување во управна постапка од работен однос во втор степен, но истата била одбиена. Потоа, таа повела тужба пред Управниот суд, тврдејќи дека селекцијата требало да се врши според јасно утврдени критериуми – просек на студии, резултати од стручни тестови, квалификационен испит и познавање странски јазик.

Сепак, и Основниот и Апелациониот суд во Гостивар застанале на ставот дека тоа што кандидатот е прворангиран на листата не го обврзува директорот да го вработи. Судовите оценија дека директорот има дискреционо право да избере кој било кандидат што ги исполнува општите и посебните услови, без обврска да го избере оној со најмногу бодови.

Во образложението се наведува дека член 161 од Законот за здравствена заштита и член 21 од Законот за работни односи му даваат право на работодавачот слободно да одлучи со кој кандидат ќе склучи договор за вработување, сè додека кандидатот ги исполнува пропишаните услови.

Со оваа пресуда, судовите потврдуваат дека високото рангирање и најголемиот број бодови не гарантираат вработување, доколку работодавачот одлучи поинаку.