Хегсет го преживеа обидот за отповикување: обвинет за војна во Иран без одобрение, а Конгресот го испрати случајот во одбор

Обидот за отповикување на американскиот министер за одбрана Пит Хегсет заврши таму каде што завршуваат повеќето непријатни прашања во политиката – во одбор. Мнозинството во Претставничкиот дом одлучи предлогот да го препрати до Одборот за правосудство, каде што мнозинство имаат токму републиканците. Разликата беше тесна, 211 наспроти 204 гласа, а повеќе од десетмина пратеници, меѓу кои и 11 демократи, воопшто не излегоа на гласање.

Иницијативата ја покрена Томас Маси, републиканец кој одамна е во отворена расправија со сопствениот претседател. Во обвинението од осум точки, официјално поднесено во понеделникот, тој тврди дека Хегсет „го крши законот и мора да одговара“, бидејќи води војна во Иран подолго од 90 дена без одобрение од Конгресот. Хегсет е обвинет и за надзор над „вонсудски убиства“ во американската операција против бродови осомничени за пренос на дрога во Тихиот Океан и Карипското Море. На гласањето, Маси остана единствениот републиканец што се спротивстави на препраќањето во одбор.

Хегсет одговори на својот прв брифинг за новинари во Пентагон по цели шест месеци – и не штедеше зборови. Обидот го нарече „фарса“ и „саботажа“, а Маси „незадоволен и поразен“ противник на администрацијата. Според министерот, резолуцијата им праќа порака на американските непријатели дека САД ќе ги казнуваат сопствените војници и цивилното раководство за „успешно спроведување законски воени операции“. „Тоа не е патриотизам. Тоа е саботажа“, порача тој. Додаде дека Маси го мотивирале политички несогласувања, а не „тешки злосторства, престапи, предавство или поткуп“, за кои основачите на САД го предвиделе отповикувањето.

Трамп го прослави исходот на Truth Social, каде напиша дека обидот „бедно ПРОПАДНА“. „Победите во Венецуела и Иран, најдобриот одзив за војската во историјата (долги листи на чекање!) и морал каков ретко се гледа доведоа до ОСЛОБОДУВАЊЕ на еден голем американски патриот“, напиша претседателот. Обвинението беше дека војната се води без дозвола од Конгресот. Одговорот беше список на победи. Дали некој воопшто одговори на прашањето што беше поставено?

Маси по гласањето изјави дека „не е изненаден“, но е „разочаран“. „Мојата дијагноза за Конгресот е дека овие луѓе знаат што треба да се направи. Само не можат да се натераат на тоа, дури ни кога политички би им користело“, рече тој. И самиот признал дека обидот можеби нема веднаш да успее, но сметал дека може да го натера Трамп да го смени Хегсет пред демократите да почнат своја постапка – за Сенатот да има време да потврди замена додека републиканците сè уште се мнозинство.

Маси не е прв пат на удар од Белата куќа. Порано годинава ги изгуби прелиминарните избори од кандидат што го поддржа Трамп, а гневот на претседателот го навлече уште кога бараше администрацијата да ги објави документите за починатиот сексуален престапник Џефри Епстин.

Хегсет овој пат политички преживеа, но прашањето колку уште ќе издржи го поставуваат и дел од републиканците. Сенаторот од Тексас Тед Круз изјави дека очекува министерот или да поднесе оставка или Трамп да го смени. А резолуциите за отповикување можат да се пренесат во следниот состав на Конгресот, што значи дека демократите можат да го отворат случајот кога во јануари ќе ја преземат контролата врз двата дома. Балканот ја знае оваа сцена напамет: кога мнозинството одлучува дали своите ќе одговараат, одговорноста не исчезнува – само чека да се смени мнозинството.