Во организација на Здружението „Бадникови поворки“, денеска низ Македонија и македонската дијаспора се одржува традиционалната Бадникова манифестација, која и оваа година ќе обедини илјадници деца, семејства и граѓани во духот на заедништвото, љубовта и радоста по повод Христовото Рождество.

Бадниковите поворки ќе се одржат во повеќе од 80 градови и населени места низ земјава, како и меѓу македонската дијаспора во Словенија, Италија, Австрија, Франција и Соединетите Американски Држави.

Централната Бадникова поворка во Скопје ќе ги обедини учесниците од речиси сите скопски општини. Градоначалниците и општинските тимови ќе ги пречекаат и даруваат коледарчињата во своите општини, по што со организиран превоз децата и нивните семејства ќе се упатат кон централниот настан.

Формирањето на поворката ќе започне пред Музејот на Град Скопје од 11:30 до 12:00 часот, каде децата ќе добијат божикни ѕвездички и пригодни подароци. Точно напладне, пеејќи ја песната „Вечниот Бог“, поворката ќе тргне по улицата „Македонија“ кон плоштадот „Македонија“.

На плоштадот ќе следува „Божикната авантура“ – голема музичко-сценска изведба во живо со повеќе од 40 уметници, реализирана под уметничко раководство на Владо Дојчиноски.

Бадниковите поворки веќе 16 години се симбол на светлина, детска радост и достоинствено празнување на Бадник, а манифестацијата е поддржана од Министерството за култура и Град Скопје.