Смртна казна за поранешен претседател: Јужна Кореја пред историска пресуда

Јужнокорејските обвинители денес побараа смртна казна за поранешниот претседател Јун Сук Јеол, обвинувајќи го дека бил „водач на бунт“ поради обидот за воведување воена состојба во декември 2024 година, јавува агенцијата Јонхап.

На 3 декември 2024 година, Јун неочекувано прогласи воена состојба, образложувајќи ја одлуката со наводна закана од „антидржавни сили наклонети кон Северна Кореја“. Потегот предизвика силна политичка криза и масовен отпор во парламентот.

Пратениците веднаш му се спротивставија на потегот, по што парламентот ги суспендираше неговите претседателски овластувања, а Јун беше уапсен, приведен и обвинет – прв ваков случај со актуелен претседател во историјата на Јужна Кореја.

Според обвинителството, истрагата открила постоење на детално подготвен план за задржување на власта, кој датира уште од октомври 2023 година. Планот, како што беше наведено во завршниот збор пред Централниот окружен суд во Сеул, наводно бил координиран од Јун и поранешниот министер за одбрана Ким Јонг Хјун.

Иако бунтот е казнив со смрт според јужнокорејскиот закон, во земјата со децении не е извршена смртна казна, што ја прави оваа постапка исклучително чувствителна и историски значајна.

Јун Сук Јеол (65) ги негира сите обвиненија, тврдејќи дека прогласувањето на воена состојба било во рамките на неговите уставни овластувања и дека целта била да се алармира јавноста за блокадите од страна на опозицијата.

Одлуката на Централниот окружен суд во Сеул се очекува во февруари, а случајот будно го следи и домашната и меѓународната јавност.