Генералниот секретар на СДСМ, Александар Димитриевиќ, на прес-конференција изнесе нови тврдења за наводни злоупотреби во јавните набавки, посочувајќи дека компанијата „Ленди Груп” ДООЕЛ Скопје за период од две години добила вкупно 74 тендери чија вредност достигнува 17,6 милиони евра. Според опозицијата, нагло зголемување на склучените договори со оваа фирма започнало во 2024 година и продолжило низ целата 2025 година.

Димитриевиќ нагласи дека само минатата година биле потпишани 59 договори, претежно со општини раководени од владејачката коалиција. Особено загрижувачки, според него, е фактот што вредностите на склучените договори речиси целосно се совпаѓаат со проценетите тендерски суми. „Тоа е основен индикатор за наместени тендери и јавни набавки”, истакна Димитриевиќ.

Генералниот секретар на опозициската партија ги стави новите наводи во контекст на претходните обвинувања, потсетувајќи дека Антикорупцискиот тим на СДСМ веќе објавил податоци за 161 тендер доделен на фамилијарна фирма на лице блиско до власта, како и за уште 51 тендер за друга компанија преку општини. „Власта си ги дели милионските тендери како колачи”, порача Димитриевиќ.

Опозицијата упати остри критики и кон надлежните институции, наведувајќи дека поминале 53 дена откако биле презентирани претходните наоди, а сè уште нема никаква институционална реакција. Димитриевиќ го обвини Јавното обвинителство, Државната комисија за спречување корупција и Финансиската полиција за целосно молчење по однос на доставените докази и податоци.

„Нема пари за повисоки плати, субвенциите за земјоделците се кратат за 40 милиони евра, а зад грбот на народот истите фирми добиваат милионски тендери”, изјави Димитриевиќ, нагласувајќи го контрастот меѓу штедењето на буџетски средства за граѓаните и обемните набавки за компании наводно поврзани со власта.

Од СДСМ најавија дека нивниот Антикорупциски тим ќе продолжи со објавување дополнителни документи и податоци, барајќи одговорност од институциите. „Оваа истрага не е завршена”, порача Димитриевиќ, додавајќи дека ќе има одговорност за секоја злоупотреба на јавните средства.