Македонското министерство за надворешни работи и надворешна трговија го издаде итниот апел до сите македонски граѓани кои се наоѓаат на територијата на Мексико: земјата да ја напуштат во прва можна и безбедна прилика. Причина е драматичното влошување на безбедносната состојба по ликвидацијата на шефот на нарко-картелот ЦЈНГ, Ел Менчо, и последователните одмазднички напади на картелот.

Министерството исто така им порача на македонските државјани да ги одложат сите патувања кон Мексико кои не се од итен и неопходен карактер. Безбедносната ситуација во Мексико нагло се влоши откако мексиканската армија, со разузнавачка поддршка, го ликвидира нарколидерот. Картелот одговори со бран на насилство — блокади на сообраќајниците, палење возила и вооружени судири, особено во сојузните држави Халиско, Мичоакан и Гвадалахара.

За македонски граѓани кои имаат потреба од конзуларна помош, МНР обезбеди 24-часовен СОС-дежурен телефон на бројот +389 75 268 736. Дипломатско-конзуларното претставништво во Вашингтон, кое е надлежно за Мексико, е достапно на +1 (202) 758-7798. Граѓаните кои се наоѓаат во засегнати региони треба да останат во контакт со локалните власти и да следат упатства за безбедно движење.

Сличен апел до своите граѓани упатија и бројни европски земји, а неколку авиокомпании претходно соопштија за отказување на летови поради состојбата на теренот. Туристичките агенции советуваат да се откажат сите резервации за во наредниот период.