Граѓаните на Струга веќе 19 дена живеат без вода за пиење, а краjот на кризата сè уште не се гледа. И покрај мало намалување на нивото на матност, надлежните соопштија дека забраната за пиење на водата останува во сила сè додека не се добијат три последователни нормални мерења низ целиот систем.

Мерењата покажуваат дека матноста во градот моментално се движи меѓу 0,62 и 1,73 (дозволена граница: 1,5). Три мерни точки веќе покажуваат нормални вредности, но изворот „Шум” – клучниот водоснабдувачки извор – сè уште бележи матност од 6,61, во споредба со 1,46 претходниот ден.

Кризата започна откако изградбата во близина на водоснабдувачките извори во с. Шум предизвика нагло зголемување на матноста. На 9 февруари беа измерени екстремни вредности od 28,56 – далеку над дозволената граница. Градоначалникот ја поврзува ситуацијата со ископните работи спроведени во претходните години.

Основното јавно обвинителство во Струга покрена постапка и изрече мерки против две правни лица од Велес, ограничувајќи им го пристапот до парцелите каде биле изведени работите. Меѓутоа, јавноста сè уште бара конкретна одговорност и трајно решение за водоснабдувањето.

Градот засега се снабдува преку алтернативни извори од Белица и с. Заграчани. Граѓаните продолжуваат да добиваат вода преку цистерни, но барањата за постојано снабдување со безбедна вода за пиење остануваат без конечен одговор.