Министерот за надворешни работи Тимчо Муцунски учествуваше на Будимпештанскиот балкански форум 2026 во Унгарија, каде зема збор на панелот „Централна Европа и Западен Балкан во новата геополитичка ера”. На дебатата покрај Муцунски учествуваа и унгарскиот министер за надворешни работи и трговија Петер Сијарто и заменик-премиерот за надворешни работи на Црна Гора Филип Ивановиќ.

Муцунски потенцира дека Македонија има силно проевропско општество и дека владата е посветена на европски реформи и целосно усогласување со Заедничката надворешна и безбедносна политика на ЕУ. „Нашата задача е да бидеме предвидлив партнер на Европската унија, но го очекуваме истото назад”, изјавил тој, нагласувајќи дека предвидливоста мора да биде реципрочна. Во тој контекст, Македонија очекува јасен, кредибилен и предвидлив процес на проширување на ЕУ.

Министерот ја истакна стратешката важност на коридорите 8 и 10 за регионалната безбедност, економијата и трговијата, и ја потенцира изградбата на интерконектор со Грција кој ќе овозможи пристап до течен природен гас од пристаништето Александрополис. Меѓу приоритетите на македонскиот министер беше и зајакнувањето на партнерството со Унгарија, земја која Муцунски ја опиша како „стратешки партнер и поддржувач на европскиот пат на Македонија”.

Муцунски додаде дека во услови на засилени безбедносни и геополитички предизвици, владите мора брзо да се прилагодуваат и соработуваат, бидејќи соработката е „единствената вистинска опција”. Посетата на Будимпеща е дел од дипломатскиот ангажман на Македонија во регионот во период кога геополитичките превирања, пред се конфликтот со Иран и ситуацијата во Украина, ги зголемија притисоците врз проширувањето на ЕУ.