По повеќе години чекање, конечно се поставува мостот на Момин Поток во Скопје. Градоначалникот Орце Ѓорѓиевски сподели фотографии од напредокот на градилиштето на социјалните мрежи, пожелувајќи добро утро на Скопјани со порака дека работите одат напред.

Проектот започна во јули 2021 година со проценета изградба од 2,5 години – сега, во 2026, конечно влегува во завршна фаза. Причините за доцнење биле густиот сообраќај и нерешени имотни прашања, кои сега се надминати, соопшти Ѓорѓиевски.

Тоа е еден од поважните инфраструктурни зафати во Скопје – јазолот на Момин Поток поднесува околу 25.000 возила дневно и поврзува четири општини. Проектот вклучува изградба на два кружни текови, два моста над Серава, потпорни ѕидови, комуналната инфраструктура и велосипедска и пешачка патека. Тековните работи се фокусирани на атмосферска канализација по Булевар „Никола Карев” (550 метри) и изградба на новиот мост над Серава (44 метри ширина).