Поранешниот државен јавен обвинител Љупчо Коцевски откри сериозни институционални слабости и недостиг на ресурси во истрагата за пожарот во дискотеката „Пулс” во Кочани, трагедија во која загинаа 63 лица.

Основното јавно обвинителство во Кочани немало капацитет самостојно да го води случајот. Поради законскиот рок од 90 дена за подигнување обвинение, тимот беше проширен од пет на 13 обвинители, со помош од Скопје и Штип.

Недостатокот на ресурси бил очигледен: немало доволно службени возила и морале да се користат полициски ресурси; немало административен персонал и морале да се ангажираат дактилографи од Штип; работата се одвивала интензивно преку викенди и празници.

Обвинителите морале да воспостават чувствителна комуникација со семејствата на жртвите, кои првично се противеа на обдукции. Преку три организирани средби со присуство на претставници на форензичка медицина, обвинителите ја објаснија неопходноста од стручни прегледи.

Иако истрагата резултираше со подигнати обвиненија, Коцевски изрази скептицизам дека државата ќе извлече поуки од трагедијата. „Откривме и други кривични дела кај дел од осомничените, што дополнително го потврдува системскиот пропуст и слабата теренска контрола”, изјави тој.