Позицијата на Европа во однос на конфликтот со Иран ризикува да го наведе американскиот претседател Доналд Трамп да се повлече од украинскиот конфликт, предупреди неговиот поранешен советник за национална безбедност Џон Болтон.

Болтон во интервју за Евроњус ги критикуваше европските лидери за нивниот одговор на случувањата на Блискиот Исток. „Европа се соочува со еднаква, ако не и поголема опасност од нуклеарен напад доколку Иран дојде до нуклеарно оружје”, изјави тој.

Според него, Иран има способност да лансира ракети кои можат да дофатат до Централна и Источна Европа, но не и до Соединетите Американски Држави. Токму затоа, конфликтот со Иран е „европска војна”, а не американска.

Болтон предупреди дека европските лидери со својот недостаток на политичка волја за воена акција против Иран можат да го „поканат” Трамп да заклучи дека „Украина не е американска војна”.

Поранешниот амбасадор на САД при ОН нагласи дека доколку Европа не покаже поголема решителност, последиците ќе бидат далекусежни не само за Блискиот Исток, туку и за безбедносната архитектура на целиот континент.